Embilik munaıshylar jyl saıyn Naýryz toıyn aıryqsha saltanatpen atap ótedi. Bıylǵy mereke Maqat aýdanyndaǵy «Dossormunaıgaz» munaı-gaz óndirý basqarmasynyń Botaqan ken ornynda toılandy. Aqshańqan kıiz úıler, tógilgen kúı men shyrqalǵan án en daladaǵy ken alańyn naǵyz dýmanǵa toltyrdy.
«Embimunaıgaz» aksıonerlik qoǵamyna qarasty alty óndiristik qurylymdyq bólimsheniń eńbek ujymdary Ulystyń uly kúnine úlken daıyndyqpen kelipti. Botaqandaǵy merekege 450-ge jýyq adam qatysyp, dástúr-saltymyzǵa degen qurmetterin kórsetti.
– 2017 jyly óndiristik jospardy tabysty oryndadyq, – dedi «Embimunaıgaz» AQ basqarma tóraǵasy Ánýar Jaqsybekov. – Bul – ǵasyrǵa jýyq ýaqyt boıy halyq ıgiligi úshin aıanbaı eńbek etip kele jatqan ujymdaǵy birliktiń, tatýlyqtyń naqty aıǵaǵy. Embilik munaıshylar qashanda eren eńbektiń úlgisin kórsetip keledi. Kompanııada bes myńnan astam jumysshy qyzmet etedi, búgingi jetistigimiz – solardyń ýaqytpen sanaspaı atqarǵan mańdaı terleriniń jemisi.
Sharaǵa arnaıy kelip qatysqan «QazMunaıGaz» Barlaý О́ndirý» AQ bas dırektory Qurmanǵazy Esqazıev embilik munaıshylardyń ótken jylǵy jospardy artyǵymen oryndap, bıylǵy eki aıda 457 myń tonna munaı óndirgenderine alǵys aıtyp, jetistikterdiń jalǵasyn tabýyna tilektestik bildirdi. Merekege oraı eleýli eńbekterimen daralanǵan qyzmetkerlerge alǵys hattar tabystaldy.
Botaqan ken ornyna jınalǵan munaıshylar dala tósin ásem ánge toltyrdy. Kıiz úılerde mol dastarqan jaıylyp, qazan kóterilip, ulttyq salt-dástúrlerden kórinister qoıyldy. Munaıshylardy merekemen quttyqtaýǵa Qazaqstannyń eńbek sińirgen qaıratkeri Aıgúl Qosanova men belgili ánshi Aqylbek Jemeneı kelip, óner kórsetti. «Injý-marjan» bı toby, Dossor mádenıet úıiniń folklorlyq ansambli men ónerpazdary da saltanattyń sánin keltirdi. Bul kúni munaıshylar da aıanyp qalǵan joq. Túrli ulttyq sporttyq oıyndarǵa qatysyp, baq synady. «Kir tasyn kóterý», «Bilek kúshin synaý», «Arqan tartý» sekildi saıystarǵa shyqty. Jeńimpazdar arnaıy syılyqtarǵa ıe boldy.
Aıta ketsek, kompanııa sońǵy jyldardyń ózinde ǵana respýblıkalyq jáne jergilikti bıýdjetke salyq túrinde 654 mlrd teńgeden astam, óńirlik ınfraqurylymdy damytýǵa 2,3 mlrd teńge, demeýshilik pen qaıyrymdylyq retinde 2 mlrd teńge qarajat bólgen. Qashanda halyqqa qaraılasyp, el ıgiligin eselep júretin Embimunaıgazdyń qaı bastamasyna da atyraýlyqtar qurmetpen qaraıdy. Qazaq dalasynda Ulystyń uly kúni aıtylar áńgime men tartylar dám kópke ortaq bolǵan. Osy úrdis áli kúnge jalǵasyn taýyp keletini qýantady. Ásirese qaıyrymdylyq pen jaqsylyq jasaý Naýryz toıynyń mánin arttyra túseri anyq. Bul daǵdydan embilik munaıshylar da jańylmady. Merekelik shara aıasynda «Meıirimdi meken» qaıyrymdylyq jármeńkesi uıymdastyryldy. Oǵan onnan astam jergilikti qolónershi men sýretshi týyndylaryn usyndy. Jármeńkege kompanııanyń 60 jumysshysy da qatysty. Biri toqyma buıymdaryn ákelse, biri tátti kúlshe jasap, endi biri salǵan sýretterin, jasaǵan zergerlik áshekeılerin qoıdy.
Botaqandaǵy mereke berekeli dastarqan basyndaǵy ashyq-jarqyn júzdesýge ulasty. Osylaısha qoınaýy qazynaǵa toly munaıly aımaqtaǵy ken ornyna jınalǵandar kóktemniń keremet meıramyn shat-shadyman kúıde qarsy aldy. О́tken jyldy tabysty qorytyndylaǵan embilik munaıshylardyń bıylǵy mejeleri de aıqyn. Olar qaı iste de eń bastysy birlik pen bereke ekenin jaqsy biledi.
Baqytgúl BABASh, «Egemen Qazaqstan»
ATYRAÝ